Pasifika navigation
- Home
- Widgets
- Effective teaching
- Engaging with parents
- Tapasā
- Talanoa Ako - Pacific Talk About Education and Learning (TA PTEL)
- Pacific Education 2020–2030
- LEAP
- Pacific languages
- About this site
- Resources
- Research
O le iloa faitau ma tusitusi o le mafai lea ona mālamalama ma fa'aaogā le gagana tusitusi. E lē gata i le iloa mātau 'upu, 'ae iloa fa'auigaga 'ese'ese o le gagana ua fa'amauina i tusitusiga. Ua mālamalama fo'i ma iloa fa'aaogā aga o le tu'ufa'atasia o le gagana, 'aemaise ai le feso'otaiga o le gagana ua fa'aaogā i se 'autū, ma le 'aufaitau.
I le soifuaga i nei ona pō, e tele na'uā tāua o le iloa faitau ma tusitusi. Ua fa'alagolago i ai le fa'alauteleina o le poto ma le atamai ma le fa'atinoga o mana'oga e sa'ilia ai le tamao'āiga. Ua mafuli i ai le tele o gāluega i o lātou feso'ota'iga 'ātoa ai ma le va i fafo.
Ua fesoasoani tele fo'i i le fa'amauina o tala'aga o 'āiga, fa'alapotopotoga, ma faigāmālō. O le mafai e le tagata ona 'auai ma fa'atino lana aiātatau i vāega 'ese'ese o le soifuaga i lona atunu'u, ua fa'alagolago tele lea i lona iloa o le gagana tusitusi. O feso'ota'iga i nusipepa, o fa'amatalaga tusitūsia i fale'oloa, o pili 'ese'ese e pei o le eletise, suāvai, nonōgatupe, o fale e mautotogi ai, o tusitusiga fa'aletulāfono, po'o pepa malaga, o ni isi ia o le anoano o vāega o le soifuaga e mo'omia ai le iloa faitau, ma tusitusi. O le vaivai o le faitau ma le tusitusi ua fa'ava'atu'ia ai le 'auai o se tagata i le tele o gāoioiga o le soifuaga fa'aneionapō.
'Ae ui i lea, e ao ona silafia e 'ese'ese le tāua ma le fa'amamafa e 'ave e aganu'u ta'itasi i le gagana tusitusi. O nisi o aganu'u e fa'atāuaina le tu'utu'utaliga o ō lātou tala'aga fa'apea fagogo ma talatu'u. O le gagana tautala sa sa'ilia ai tomai ma agava'a. O ni isi sa fa'atāuaina le a'o fa'atauloto o tomai ma agava'a mo'omia. 'A'o ni isi sa fa'atā'uaina le faitau ma faamaumau i tusitusiga. O le manatu tāua, e aogā 'uma 'itū'āiga faiga nei i le atina'eina o le gagana fa'amauina i tusitusiga.